17.10.2015թ.-ին ժամը 18.30-ին Բեռլինի հայ համայնքի հոգևոր հովիվ Տեր Գնել քահանա Գաբրիելյանի ձեռմամբ աղոթքով Բեռլինի Լիխտենբերգ շրջանի <<Ամենափրկչի>> եկեղեցում սկսվեց Հայաստանից ժամանած <<ՍԱՆԿՏՈԻՍ>> համույթի ակապելլա համերգը։ Համերգը, որին այցելել էին բազմաթիվ ունկնդիրներ, գերազանցեց բոլորի ակնկալիքները։ Կոմիտասը հանդիպում է Բախին, հայ երգարվեստը՝գերմանականին. ահա այսպես էր նախապես ներկայացված ծրագրում այս համերգի խորհուրդը։ Իսկ թե ի՞նչ էր նրա հետևում թաքնված, ապա այն հաճելիորեն զարմացրեց բոլորին։
ՀԵՄԱ հ/կ Առաջին Նախագահի ողջույնի և Պաուլ Գերհարդի անվան Ավետարանական եկեղեցուն ուղղված երախտագիտության խոսքից հետո՝ տան տիրոջ ջերմ ընդունելությամբ ելույթ ունեցավ ավետարանական եկեղեցու գերապատվելի Յոախիմ Ցիրպկան։ <<Հավատակից սիրելի հայ քույրեր և եղբայրներ, համերգի սիրելի այցելուներ, ես նույնպես սրտագին ողջունում եմ Ձեզ այս երեկոյի կապակցությամբ։ Ուրախ ենք և մի փոքր էլ հպարտ, որ Դուք կանոնավոր կերպով հյուրընկալվում եք մեզ մոտ։ Դուք եկեղեցու ծածքի տակ եք և դրանով մեր արմատների մի անքակտելի մասը, իսկ բոլոր տարբերությունները հաշվի առնելով՝Դուք նույնպես այն սովորույթի մի մասն եք կազմում, որը մեզ կապում է տեր Հիսուս Քրիստոսի հետ>>,- նշեց գերապատվելի Ցիրպկան իր ելույթում, ապա անցավ 100 տարի առաջ Մեծ Եղեռնի ժամանակ հայ ժողովրդի կրած տառապանքներին, որը նաև գերմանական մեղսակցության արդյունք էր։ <<Այն հնարավոր չէ չեղյալ համարել, բայց կարելի է մշակույթի փոխանակման միջոցով միմյանց ավելի լավ հասկանալ, որպեսզի անցյալի վերքերը միասնաբար ավելի հեշտությամբ ու արագ ամոքել>>,-ասաց գերապատվելի Ցիրպկան։ Այնուհետև հետևեց <<ՍԱՆԿՏՈՒՍ>> համույթի ակապելլա ելույթը երգիչ-երգչուհիների հետևյալ կազմով.
Ռադիկ Մելիքյան – Sanctus վոկալ անսամբլի գեղարվեստական ղեկավար և տնօրեն Ծնվել է 1969թ. Երևանում: Ավարտել է Երևանի Կոմիտասի անվան պետական կոնսերվատորիայի խմբավարության, օպերային-սիմֆոնիկ դիրիժորության բաժինները և ասպիրանտուրան: 2004թ. հիմնադրել է Sanctus վոկալ անսամբլը և մինչև այժմ հանդիսանում է անսամբլի գեղարվեստական ղեկավարը և տնօրենը:
Հենրիետտա Հարությունովա – soprano Ծնվել է 1978թ. Երևանում: Ավարտել է Երևանի Կոմիտասի անվան պետական կոնսերվատորիայի դաշնամուրային և ակադեմիական վոկալ բաժինները: 2004թ.-ից Sanctus վոկալ անսամբլի անդամ:
Նինա Ամիրյան – alto Ծնվել է 1986թ. Երևանում: Ավարտել է Երևանի Կոմիտասի անվան պետական կոնսերվատորիայի ակադեմիական վոկալ բաժինը: 2014թ.-ից Sanctus վոկալ անսամբլի անդամ:
Էդգար Վարոսյան – tenore Ծնվել է 1986թ. Երևանում: Ավարտել է Երևանի Կոմիտասի անվան պետական կոնսերվատորիայի ակադեմիական վոկալ բաժինը: 2006թ.-ից Sanctus վոկալ անսամբլի անդամ:
Վահագն Բաբլոյան – basso Ծնվել է 1969թ. Երևանում: Ավարտել է Երևանի Կոմիտասի անվան պետական կոնսերվատորիայի նվագախմբային բաժինը՝ ջութակ մասնագիտությամբ: 2005թ.-ից Sanctus վոկալ անսամբլի անդամ:
Սանկտուս անսամբլը հիմնադրվել է 2004թ. Ռադիկ Մելիքյանի կողմից՝ նպատակ ունենալով ներկայացնել արևմտաեվրոպական, հայկական միջնադարյան և դասական վոկալ երաժշտություն: Խումբը բազմաթիվ համերգներ է ունեցել ինչպես Երևանում, այնպես էլ աշխարհի հեղինակավոր համերգասրահներում (Գերմանիա, Շվեյցարիա, Կանադա, Սիրիա, Իրան) և արժանացել բարձր գնահատականների: Տիգրան Մանսուրյանը՝ Սանկտուսի մասին. <<Սանկտուսը ունեցել է լուրջ ստեղծագործական հաջողություններ՝ ներկայացնելով արևմտաեվրոպական դասական գործեր՝ միևնույն ժամանակ ստեղծելով բացառապես հայ հոգևոր և աշխարհիկ երկացանկ: Սա իսկապես նորամուծություն էր, քանի որ մեզանում գոյություն չի ունեցել բազմաձայն անսամբլային վոկալ երաժշտության ավանդույթը, և նման կազմերի համար ստեղծագործություններ գրված չեն եղել: Ռադիկ Մելիքյանի նվիրված աշխատանքի շնորհիվ խմբի հայկական երկացանկը ունի գրավիչ նրբերանգներ, ինչը խմբին հաղորդում է անկրկնելի հնչողություն>>:
Համերգային երեկոյի ծրագրում ներառված էին.
Կոմիտաս՝ հոգևոր ստեղծագործություններ.
- Հայր մեր
- Սիրտ իմ սասանի
- Տեր ողորմեա
- Սուրբ, սուրբ
Կոմիտաս՝ աշխարհիկ ստեղծագործություններ.
- Երկնից, գետնից (հարսանեկան երգերի շարք)
- Պուճուր աղջիկ սևավոր (շարք)
- Ամպել ա կամար-կամար (շարք)
- Անձրևն եկավ
- Շողեր ջան
-Ընդմիջում-
- Տ. Մանսուրյան – Ասացված հոր համար
- Տ. Մանսուրյան – Ալագյազի լանջերում
- Տ. Մանսուրյան – Արևելքից մի հավք եկավ
- Դ. Հալաջյան – Իմ սիրականս ավաղ…
- Մ. Վարդազարյան – Մշտադալար ծառ
- Յո. Ս. Բախ – Choral prelude
- Յո. Ս. Բախ - Air
Կատարումների վերջում ծափահարությունները չէին դադարում։ Ապա պարոն Մինասյանը ՀԵՄԱ հ/կ-ի կողմից, ի հիշատակ այս համերգային երեկոյի, ՍԱՆԿՏՈՒՍ երգչախմբի երգիչ-երգչուհիներին և նրա գեղարվեստական ղեկավարին բաժանեց Բեռլինի խորհրդանիշը կազմող փոքրիկ արջուկների քանդակները, որոնց հեղինակն է Պոտցդամ քաղաքի հայազգի քանդակագործ Ալիկ Աղվանյանը։ Մի առանձնահատուկ հուշանվեր էր պատրաստվել նաև Ավետարանական Պաուլ Գերհարդի անվան Եկեղեցու գերապատվելի պարոն Յոախիմ Ցիրպկայի համար՝ նրան հանձնելով մի պայուսակ, որի վրա Հայոց Ցեղասպանության հիշատակը ի թիվս այլ նկարների խորհրդանշող անմոռուկի պատկերն էր երևում։ <<Այս պայուսակը 1915թ.-ի Հայոց Ցեղասպանության 100ամյակի հիշատակման համար է պատրաստված։ Մենք ուզում ենք, որ Դուք՝ որպես մեր լավ բարեկամ, այս հիշողության բեռը մեզանից մասնակիորեն վերցնեք, այն կիսենք Ձեզ հետ և նաև Դուք մեզ հետ միասին այն կրեք>>, ասաց պարոն Մինասյանը։
Միջոցառումն ավարտվեց Տեր Գնել քահանա Գաբրիելյանի կողմից <<Հայր Մեր>> աղոթքը արտասանելով։
ՏԵՍԱՀՈԼՈՎԱԿՆԵՐ
