Պարգևատրվեցին Հայաստանում և Արցախում Մարդու Իրավունքները և Բարեկամությունն Ամրապնդելու Համար

 25 Mar 2017 Սփյուռք  Comments OffOn Պարգևատրվեցին Հայաստանում և Արցախում Մարդու Իրավունքները և Բարեկամությունն Ամրապնդելու Համար  1170 Vues

Գերմանիայում գործող «Եվրոպացի և հայ մասնագետների ասոցիացիան» նախագահ Միքայել Մինասյանի ղեկավարությամբ մարտի 12-ին ուշադրության արժանացրեց Բեռլինում ապրող այն անհատներին, ովքեր այս կամ այն չափով պայքար են տարել` Հայաստանում և Արցախում մարդու իրավունքների և բարեկամության ամրապնդման համար: Բեռլինի Լիխտենբերգ թաղամասի Սուրբ Փրկիչ եկեղեցու սրահում պարգևատրվեցին ազատամարտիկներ Էդգար Զոհրաբյանը, Էդվա րդ Սաֆարյանը, Գուրգեն Իսախանյանը և Սարո Խուդոյանը: Պատվոգրերը և հուշանվերները նրանց հանձնեց բեռլինաբնակ հայտնի հայ բռնցքամարտիկ Արթուր Աբրահամը:

Վերջիններիս իր խորին շնորհակալությունը հայտնեց Գերմանիայում Արցախի մշտական ներկայացուցիչ Հարություն Գրիգորյանը` նշելով, որ շատերի նման նրանք էլ են մի կողմ դրել իրենց անձնական անվտանգությունը և ինչ-որ չափով մասնակցել ընդհանուր գործին. «Անկախ նրանից, թե դուք որտեղ և ինչպես եք գործել, Ձեր ներդրմամբ ամրապնդել եք հասարակությունը Հայաստանում և Արցախում: Մենք խոնարհվում ենք Ձեզանից յուրաքանչյուրի առաջ, որ բոլոր մեր հերոսների հետ միասին մեզ հպարտանալու առիթ եք տվել, որ այսօր հայն ու մասնավորապես արցախցին իր հողի վրա հայերեն խոսելու և ապրելու իրավունք է ձեռք բերել: Այդ պայքարն առ այսօր շարունակվում է, հենց այս պահին, այս ցրտին, սահմանին հազարավոր զինվորներ են կանգնած և ուշիուշով հսկում են թշնամու ամեն մի շարժը: Ուժ և կամք նրանց: Մենք խոնարհվում ենք քո առաջ, հայ զինվոր, մենք քեզ հետ ենք»:

Տոնական միջոցառումը շարունակեցին ասոցիացիայի հայկական կիրակնօրյա դպրոցի սաները` երգ ու պարով և թատերական ներկայացմամբ: Նրանք նախ երգեցին ռազմահայրենասիրական երգեր: Այնուհետև ասմունքով և պարերով շնորհավորեցին բոլոր կանանց` մայրության և գեղեցկության տոնի կապակցությամբ: «Գայա Ռոյալ» կազմակերպության ղեկավար Գայանե Խաչատրյանի հետ համատեղ երեխաները հանդիսատեսի համար պատրաստել էին Հովհ. Թումանյանի «Չարի վերջը» հեքիաթի ներկայացումը: Եզրափակիչ երգը ներկայացնելիս սաներին միացավ նաև երգիչ Արտակ Կիրակոսյանը: Փոքրիկ դերասաններն արժանացան հանդիսատեսի հոտնկայս տևական ծափահարություններին:

Գայանե Առաքելյան

 

https://www.nowarmenia.com/2017/03/25/%D5%8A%D5%A1%D6%80%D5%A3%D6%87%D5%A1%D5%BF%D6%80%D5%BE%D5%A5%D6%81%D5%AB%D5%B6-%D5%80%D5%A1%D5%B5%D5%A1%D5%BD%D5%BF%D5%A1%D5%B6%D5%B8%D6%82%D5%B4-%D6%87-%D4%B1%D6%80%D6%81%D5%A1%D5%AD%D5%B8%D6%82/?lang=hy