Գերմանահայ Թեմի Առաջնորդը և Բունդեսթագի Պատգամավորը Հայկական Կազմակերպության Անդամներ Դարձան

 24 Jul 2017 Սփյուռք  Comments OffOn Գերմանահայ Թեմի Առաջնորդը և Բունդեսթագի Պատգամավորը Հայկական Կազմակերպության Անդամներ Դարձան  798 Vues

Հուլիսի 15-ին Բեռլինի Լիխտենբերգ շրջանի «Փրկչի» եկեղեցին մարդաշատ էր: Այստեղ հանդիսավոր արարողությամբ «Հայ և եվրոպացի մասնագետների ասոցիացիա» ՀԿ պատվավոր անդամներ դարձան Գերմանիայի Հայ առաքելական եկեղեցու թեմի առաջնորդ, նորին սրբ.արքեպիսկոպոս Գարեգին Բեկչյանը և Գերմանիայի Բունդեսթագի պատգամավոր պարոն դր.Մարտին Պետցոլդը: Անդամության կոչումները նրանց հանձնեց կազմակերպության նախագահպարոն Միքայել Մինասյանը, ով հանդես եկավ նաև բացման խոսքով:

Մեզ հետ զրույցում պարոն Մինասյանը նշեց, որ վերջիններս նշանակալի գործունեություն են ծավալել գերմանահայոց համար, մասնավորապես մեծ է նրանց դերը արևելյան Բեռլինի հայերի համար: «Գարեգին արքեպիսկոպոս Բեկչյանը և դր. Մարտին Պետցոլդը մեծ դերակատարում են ունեցել նաև մեր միության համար և եղել են շարժիչ ուժ: Այդ պատճառով վարչությունը որոշեց և անդամության ժողովն էլ հաստատեց վերջիններիս ընտրել որպես պատվավոր անդամներ: Նրանց շնորհիվ է, որ մենք այս եկեղեցում կարողանում ենք պատարագներ ու միջոցառումներ անցկացնել, գերմանահայկական մշակութային օրերը կազմակերպել, Պետցոլդի դերը մեծ էր, օրինակ, ցեղասպանության բանաձևի ընդունման հարցում և այլն: Միայն կարող ուժերն են իրավիճակ փոխել կարողանում, հարկավոր է նրանց արածը գնահատել»:

Միջոցառմանը Գարեգին արքեպիսկոպոս Բեկչյանը ներկա չէր, որովհետև աշխատանքային ծառայություններով գտնվում էր Ստամբուլում: Նրա կոչումը հանձնվեց Արլ. Գերմանիայի հոգևոր առաջնորդ Տեր Գնել քահանա Գաբրիելյանին: Այնուհետև «Հիսուսի հրաշագործությունները»թատերական ներկայացմամբ հանդես եկան հայկական կիրակնօրյա դպրոցի սաները: Միջոցառումն ավարտվեց եկեղեցու բակում շախմատի մրցույթով, որին մասնակցում էին տարբեր տարիքային խմբերի թե՛ գերմանացի, թե՛ հայ երեխաներ:

Գայանե Առաքելյան

 

https://www.nowarmenia.com/2017/07/24/%D4%B3%D5%A5%D6%80%D5%B4%D5%A1%D5%B6%D5%A1%D5%B0%D5%A1%D5%B5-%D5%A9%D5%A5%D5%B4%D5%AB-%D5%A1%D5%BC%D5%A1%D5%BB%D5%B6%D5%B8%D6%80%D5%A4%D5%A8-%D6%87-%D4%B2%D5%B8%D6%82%D5%B6%D5%A4%D5%A5%D5%BD%D5%A9/?lang=hy