ԳԴՀ-ում ՀՀ դեսպան Աշոտ Սմբատյանն ընդունել է Բեռլինի հայկական դպրոցների սաներին

19:20, 2017 ԵՐԵՎԱՆ, 16 ՀՈԿՏԵՄԲԵՐԻ, ԱՐՄԵՆՊՐԵՍ: Հոկտեմբերի 14-ին` քաղաքամայր Երևանի 2799-ամյակի կապակցությամբ ԳԴՀ-ում ՀՀ դեսպան Աշոտ Սմբատյանն ընդունեց Բեռլինում գործող երեք հայկական շաբաթօրյա դպրոցների սաներին, նրանց ծնողներին և ուսուցիչներին: Ինչպես «Արմենպրես»-ին տեղեկացրին ՀՀ արտգործնախարարության մամուլի, տեղեկատվության և հասարակայնության հետ կապի վարչությունից, իր և ԳԴՀ-ում Արցախի Հանրապետության մշտական ներկայացուցիչ Հարություն Գրիգորյանի անունից ողջունելով ներկաներին` դեսպան Աշոտ Սմբատյանն ընդգծեց հայապահպանության գործում դպրոցների ունեցած մեծ դերը: ՀԵՄԱ հ/կ-ի նախագահ Միքայել Մինասյանն իր խոսքում շնորհակալություն հայտնեց ընդունելության համար, ներկայացրեց ՀԵՄԱ-ի հայկական դպրոցի հիմնադրման պատմությունը և կարևորեց սփյուռքում հայկական դպրոցների գործունեության նշանակությունը:

Հայկական դպրոցների սաները միջոցառման ընթացքում կատարեցին Հայաստանի Հանրապետության հիմնը, Էրեբունի-Երևան երգը: Աշակերտները ներկաների համար նախապատրաստել էին նաև հանդես: Միջոցառման վերջում դեսպան Ա. Սմբատյանը հայկական դպրոցների լավագույն սաներին հուշանվերներ հանձնեց:   Սզբնաղբյուրը նայիր այստեղ․ https://armenpress.am/arm/news/909091