IMG-LOGO

Օգնություն Արցախի Քերոլայն Քոքսի անվան վերականգնողական կենտրոնին

13-02-2021
IMG

Արձագանքելով Արցախի Բարոնուհի Քերոլայն Քոքսի անվան վերականգնողական կենտրոնի խնդրագրին՝ փետրվարի 12-ին երեք բեռնատար ավտոմեքենաներ բարձված մոտ 20 տոննա մարդասիրական բեռով, որոնց մեջ առկա էին ավտոմատիզացված կամ մեխանիկական մոտ 100 հիվանդանոցիային մահճակալներ, իրենց ներքնակներով և գիշերային պահարանիկներով, անվասայլակներ, կենցաղային պարագաներ, բուժօգնական միջոցներ, Հայաստանի Ապավեն տերմինալի մաքսային պահեստներից ուղևորվեցին Արցախ։ Հիշեցման կարգով նշենք, որ այս բեռները ՀԵՄԱ հ/կ համակարգմամբ «Օգնիր Արցախին, փրկիր կյանքեր» նախաձեռնության շրջանակում հավաքվել և Բաբենհաուզեն վայրի կենտրոնական պահեստներից ուղարկվել էր Բելգիա ՄԱԿ-ի կարգոյի կենտրոնական պահեստներ, որտեղից էլ Հայ Օգնության Միության Բելգիայի մասնաճյուղի աջակցությամբ դրանք դեռևս դեկտեմբեր ամսին տեղափոխվել էին Հայաստան։ Այս բեռների հավաքագրման և տեղափոխության համար առանձնահատուկ կերպով մեր երախտագիտությունն ենք հայտնում հետևյալ կազմակերպություններին և անձանց խմբերին․

 

- Հայ Օգնության Միության Բելգիայի և Հայաստանի մասնաճյուղերին, ի դեմս Պետեր Պետրոսեանի, Մարին Համբարձումյանի և Լիլիթ Հովհաննիսյանի,

- Գերմանիայում Հայ և Գերմանացի Բժիշկների և Բուժաշխատողների միությանը, ի դեմս նախագահ տիկին Սրբուհի Մարտիրոսյանի,

- Բավարիայի Հայ Հայրենակցական Միությանը, ի դեմս մեր գործընկեր Արիստակես Զաքարյանի և Աուգսբուրգ քաղաքից նվիրյալ աջակիցների խմբի և

- Արևելյան Քրիստոնյաների Միջազգային Ընկերակցությանը, ի դեմս նախագահ Պաուլուս Կուրտի,

- Բրեմենի հայ ընկերային խմբին, ի դեմս Վարուժան Խուդավերդյանի

- HeldinTrans e.K. տեղափոխությունների պրեմիում ընկերությանը, ի դեմս նրա տնօրեն պարոն Սիաբենդ Շեմոյի,

- Բաբենհաուզենի, Հանաույի և Մայնի ֆրանկֆուրտի հայ գործընկերներին, ի դեմս պահեստային աշխատանքների կազմակերպիչ Տիգրան Մարգարյանի, բեռնափոխադրումների կոորդինատոր Անդրանիկ Վարդանյանի և բեռները ցուցակագրող Ժասմեն Ասատրյանի,

 

Փետրվարի 13-ին Արցախի Քերոլայն Քոքսի անվան վերականգնողական կենտրոնն ընդունեց վերոնշյալ մարդասիրական բեռը և սկսվեցին ապրանքների մոնտաժման աշխատանքները։ ՀԵՄԱ հ/կ-ն և գերմանահայերը կշարունակեն աջակցել մեր հայրենակիցներին՝ վերականգնելու պատերազմից տուժված հաստատությունները և օգնելու կարիքավոր անձանց։

Փա´ռք ու Պա´տիվ մեր հերոսներին։

Երախտագիտությամբ՝

 

ՀԵՄԱ հ/կ Վարչություն